Իսկ ահա, կիրակի օրը Կրեմլի պալատում տեղի ունեցած «Տաշիր-2011» համահայկական երաժշտական մրցանակաբաշխության «արդյունքները» հանրությունը չկարողացավ «մարսել», եւ հենց նույն գիշերվա ընթացքում վրդովմունքի ալիք բարձրացավ հայ հասարակության շրջանում, որը «Արմենիա» հեռուստաընկերությամբ հետեւում էր մրցանակաբաշխությանը:
Կազմակերպիչները տարբեր անվանակարգերում մրցանակ շնորհելուց զատ, նաեւ բնակարանի սերտիֆիկատ ու թանկարժեք ավտոմեքենա նվիրեցին հայկական շոու-բիզնեսի ներկայացուցիչներին: Երեւանի կենտրոնում բնակարանատեր դարձան Արմենչիկը, Թաթա Սիմոնյանը, Արման Հովհաննիսյանը, Կամո Սեյրանյանը, Շուշան Պետրոսյանը, Նունե Եսայանը, Սիրուշոն, Լուսինան, իսկ «ներկայացուցչական ավտոմեքենայի» տեր դարձան Էմմին ու Ռազմիկ Ամյանը:
Բացի այդ, «Տաշիր-գրուպի» ղեկավարությունը բնակարան նվիրեց նաեւ մրցանակաբաշխությունը վարող զույգին. շոումեն Գարիկ Մարտիրոսյանին` Մոսկվայում, իսկ Քսենյա Սոբչակին` Երեւանում:
Մեղմ ասած, այս անխոհեմ քայլին անմիջապես հետեւեց միանգամայն ողջունելի նախաձեռնություն. դեռ մրցանակաբաշխությունը չավարտված` կիրակի գիշերը Facebook սոցիալական ցանցում «Կոչ Տաշիր-2011-ի աստղերին» խորագրով էջ բացվեց, որին մի քանի ժամվա ընթացքում միացան հարյուրավոր մարդիկ:
«Առաջարկում ենք մեր աստղերին (ով տան կարիք չունի) «Տաշիր-2011»-ից նվեր ստացած բնակարանները նվիրել անտուն ընտանիքներին»,-կոչ արեցին նախաձեռնության հեղինակները:
…Համաձայնեք, որ երեւույթը տգեղ է. մեր երկրում, որտեղ սոցիալ-տնտեսական իրավիճակը, մեղմ ասած, բարվոք չէ, կան բազմաթիվ ընտանիքներ, որոնք ապրում են սոսկալի պայմաններում, հանկարծ այդ մարդիկ հեռուսատեսությամբ տեսնում են, թե ինչպես են հայրենի «աստղերին» նվիրում բնակարաններ ու ավտոմեքենաներ: Այն «աստղերին», որոնք թե’ բնակարաններ ունեն, թե’ մեքենաներ, թե’ ամառանոցներ: Ընդ որում, նրանցից շատերը երկու-երեք բնակարան ու մեքենա ունեն:
Նկատենք նաեւ, որ այդ «աստղերից» շատերը նույն մեծահարուստների հարսանիքներին, ծննդյան եւ այլ հանդիսություններին են մասնակցում ու վաստակում են ոչ թե մեկ, այլ մի քանի բնակարանի գումար: Այս պարագայում ուղղակի անհասկանալի է մրցանակաբաշխության կազմակերպիչների մատուցած նվերները: Հարկ կա՞ր դիմել նման ցոփության, երբ նույն կազմակերպիչները շատ լավ գիտեն, թե ինչպես է ապրում շարքային հայաստանցին:
Խոսքը միայն անտունների մասին չէ, այլ նաեւ նրանց, ովքեր ընտանիքը պահելու համար չեն կարողանում նույնիսկ ծայրը ծայրին հասցնել: Հայաստանում ապրող չքավորների բանակի ֆոնին ուրիշ ի՞նչ կերպ կարելի է բնութագրել սույն նվիրատվությունը, եթե ոչ ցոփության ու շվայտության դրսեւորում: Այդ նվիրատվության գումարով կարելի էր մի քանի գյուղի կենսապահովման խնդիրները լուծել, ինչից տարիներ շարունակ զրկված է հայ գուղացին:
Հետաքրքիր է, այդ ո՞ր արժանիքների համար են այդպես շռայլորեն վարձատրվում հայրենի «աստղերը»: Աշխարհով մեկ հայ երգարվեստի տարածման ու քարոզման համա՞ր: Ծիծաղելի է: Ցույց տվեք այդ «աստղերից» մեկնումեկին, որը մասնակցել է միջազգային որեւէ լուրջ մրցույթի (չենք ասում` հաղթել է, այլ ընդամենը մասնակցել է): «Եվրատեսիլը» մեջտեղից հանեք, դա ավելի քան անլուրջ, քաղաքականացված մրցույթ է, որտեղ կարող է հաղթել անգամ վոկալի հետ կապ չունեցող ցանկացած մեկը:
Ուրեմն վասն ինչի՞ են ստանում 3-րդ կամ 4-րդ բնակարանն ու ավտոմեքենան»:
