Մեքսիկայի ազգային կինոարխիվը ոչ միայն Մեքսիկայի ամենամեծ ֆիլմադարանն է, այլեւ հանդիասանում է քաղաքի ամենամեծ կինոկենտրոններից մեկը, որն ունի 8 դահլիճ եւ ամեն ամիս ցուցադրում է Մեքսիկայի եւ աշխարհի կինոյի լավագույն նմուշները։
Հարություն Խաչատրյանը երկրորդ հայ ռեժիսորն է, ում ֆիլմերը կցուցադրվեն Ազգային կինոարխիվում: Մինչ այդ 2011 թվականի փետրվարի 25-ին եւ 26-ին Մեխիկոյում կայացել է Արտավազդ Փելեշյանի «Սկիզբը», «Մենք», «Վերջ», «Կյանք», «Տարվա եղանակներ» եւ «Մեր դարը» ֆիլմերի հետահայաց ցուցադրությունը։
2009 թվականից ի վեր Հարություն Խաչատրյանի ֆիլմերը հետահայաց ցուցադրումները կայացել են աշխարհի մի շարք երկրների հեղինակավոր կինոփառատոներում եւ կինոկենտրոններում։
2009-ին ռետրոսպեկտիվների շարքով ռեժիսորի աշխատանքները ներկայացվել են Ստրասբուրգում, Մոսկվայի միջազգային կինոփառատոնում, Մոնտեվիդեոյում եւ Թբիլիսիի միջազգային կինոփառատոնում, այնուհետեւ`Իտալիայի եւ Սլովենիայի 5 քաղաքներում:
2010-ին կինոռեժիսորի ֆիլմերը ցուցադրվել են Իսպանիայի, Իսրայելի եւ ԱՄՆ-ի կինոփառատոնների շրջանակներում: Մադրիդում Հ. Խաչատրյանի ֆիլմերը ներկայացվել են Վավերագրական ֆիլմերի 7-րդ միջազգային փառատոնում, Իսրայելի Սդերոտ քաղաքում 9-րդ «Cinema South» միջազգային փառատոնի համաշխարհային կինո ծրագրում, իսկ ԱՄՆ-ում ֆիլմերը դիտելու հնարվորություն են ունեցել Կոլորադո նահագի Թելուրայդ քաղաքում անցկացված Հեղինակային ֆիլմերի 37-րդ միջազգային փառատոնի մասնակիցներն ու հյուրերը։
«Ոսկե ծիրան» միջազգային կինոփառատոնն այս տարի կանցկացվի 8-րդ անգամ հուլիսի 11-17-ը:
