Կազմակերպության միջոցները հիմնականում ուղղվում են արտադրական նշանակության շինությունների կառուցման և վերանորոգման, ինչպես նաև բնակարաշինության ոլորտներ։
Ըստ Ազգային վիճակագրության ծառայության տվյալների՝ այս տարվա հունվարին իրականացված շինարարության 67,2%-ը կատարվել է կազմակերպությունների միջոցներով, իսկ 14,4%-ը՝ բնակչության։ Անցած տարվա հունվարին կազմակերպությունների հաշվին իրականացվել է շինարարության միայն 30,8%-ը, իսկ բնակչության միջոցների հաշվին՝ 9,6%-ը։ Այս տարի նվազել են նաև պետբյուջեի միջոցներով իրականացված շինարարության ծավալները։ Եթե անցած տարվա հունվարին շինարարության ֆինանսավորման 11,5%-ը բաժին է ընկել պետբյուջեի միջոցներին, ապա այս տարվա հունվարին պետբյուջեի միջոցներով կատարվել են 7,2% շինարարական աշխատանքներ։ Փաստացի շինարարության ոլորտում ճգնաժամի հետևանքով տեղի է ունեցել կառուցվածքային լուրջ փոփոխություն։
Նախաճգնաժամային 2008թ. շինարարության 79,2%-ն իրականացվել էր բնակչության միջոցների հաշվին, իսկ 12,7%-ը՝ կազմակերպությունների։ Բնակչության միջոցներով իրականացվող շինարարության տեսակարար կշռի նվազումը կրճատում է մասնավոր տրանսֆերտներից շինոլորտի կախվածությունը։ Հայաստանի շինոլորտի խնդիրը ճգնաժամային 2009թ. ի հայտ եկավ հենց մասնավոր տրանսֆերտների ծավալների շուրջ 30% նվազումից։
Այս տարի շինոլորտում կառուցվածքային փոփոխությունը կարող է նպաստավոր պայմաններ ստեղծել տարվա կտրվածքով ոլորտի աճի համար։ Օրինակ՝ Կենտրոնական բանկը 2011թ. առաջին եռամսյակի դրամավարկային քաղաքականության ծրագրում կանխատեսել է, որ շինարարության ոլորտում, չնայած աճի տեմպերի որոշակի արագացմանը, ճյուղի ավելացված արժեքի իրական աճը դեռևս մնում է համեմատաբար փոքր` 2-4%: Ըստ ԿԲ-ի՝ բնակչության միջոցների հաշվին իրականացվող շինարարության ծավալների էական փոփոխություններ չեն ակնկալվում:
