«Արմավիրի բաժնում ահազանգ է ստացվել, որ մարտի 21-ին ժամը 15:35-ին մի խումբ քաղաքացիներ Արմավիր-Երեւան ճանպարհի 3-րդ կմ-ին երկկողմանի փակել են ճանապարհը:
Պարզվել է, որ մարտի 20-ին կայացած Արմավիրի քաղաքապետի ընտրությունների համար առաջադրված թեկնածու Սեւակ Մ.-ի համախոհները՝ մոտ 90 մարդ, իրենց ավտոմեքենաներով փակել են Արմավիր-Երեւան ավտոմայրուղու 3-րդ կմ-ի հատվածը` մոտ 1 ժամ խոչընդոտելով ավտոտրանսպորտի բնականոն երթեւեկությունը:
Ոստիկանության ծառայողների ձեռնարկած միջոցառումների շնորհիվ վերականգնվել է մայրուղու բնականոն երթեւեկությունը:
Նշված վայրից բերման է ենթակվել 5 մարդ: Նախապատրաստված նյութերն ուղարկվել են քննչական բաժին»,- ասված է ոստիկանության մամուլի ծառայությունից:
Նշենք, որ թեժ ընտրությունների արդյունքում Արմավիրի քաղաքապետ է վերընտրվել գործող քաղաքապետ, հանրապետական Ռուբեն Խլղաթյանը:
Վերջինս լարված պայքարի արդյուքում հազար ձայնով պարտության է մատնել իր մրցակից ավագանու խորհրդի անդամ անկուսակցական Սեւակ Մինասյանին:
Եղել են նաեւ այլ թեկնածուներ՝ անկուսակցական Առնակ Գեւորգյանն ու Կարեն Վարդանյանը, սակայն պայքարը գործող քաղաքապետի ու ավագանու անդամի միջեւ է եղել:
Ցուցարարները հայտնել են, որ իրենք բողոքում են անարդար ընտրությունների դեմ եւ պահանջում անվավեր ճանաչել Խլղաթյանի հաղթանակը: Նրանց հավաստմամբ, Ռուբեն Խլղաթյանը վերանվաճել է քաղաքապետի աթոռը բազմաթիվ ընտրախախտումներով ու կեղծիքներով, որոնց մասին թեեւ իրենք հայտնել են Ոստիկանությանը, սակայն ոստիկանությունը չի արձագանքել: Ի դեպ, ըստ արմավիրցիների, վերընտրված քաղաքապետը ՀՀԿ-ական գործարար պատգամավորներ Ռուբեն Հայրապետյանի եւ Սամվել Ալեքսանյանի հովանավորյալն է:
Ի վերջո, ոստիկանությունը բռնությամբ ու քաշքշելով հրել են ցուցարարներին եւ բացել ճանապարհը: Ըստ ականատեսների, մի քանի մարդու բերման են ենթարկել ոստիկանության բաժին:
